- Официальный сайт издательства "Алматыкітап баспасы"
Сейіт Кенжеахметұлы
Журналист, этнограф-жазушы. Қазақстан Республикасының Құрмет грамотасымен, «Еңбектегі ерлігі үшін» медалімен марапатталған. Қазақстан Республикасының еңбек сіңірген мәдениет қайраткері, Қазақстан Республикасының білім саласының құрметті қызметкері. Арқалық, Торғай қалаларының құрметті азаматы.
1957 жылдан бастап сықақ, мысал өлеңдер мен әзіл әңгімелер жазып келеді. 20-ға тарта еңбектері әр жылдары Қазақстан баспаларынан жарық көрген. С. Олейник, С.Михалков, Ә.Несин, И.Крылов, т.б. ақын-жазушылардың шығармаларын қазақ тіліне аударған.
Сейіт Кенжеахметұлы ата-бабаларымыздан мұраға қалған мыңдаған мәдени құндылықтарды бүкіл саналы ғұмыры бойы тірнектеп жинап жүрген ұлт жанашырларының бірегейі.
Сейіт Кенжеахметұлының «Алматыкітап баспасынан» жарық көрген «Қазақ халқының салт-дәстүрлері», «Қазақ халқының тұрмысы мен мәдениеті», «Қазақтың дарқан дастарқаны» атты еңбектері өзіндік мазмұны, көркем безендірілуі жағынан оқырманның жүрегінен орын алып, көңілінен шыққан ерекше дүниелер. Аталмыш басылымдар үш тілде жарық көріп, алыс-жақын шетелдерге «қазақ» атын паш етіп келеді.
Әр қазақстандық автордың осы құнды еңбектерін көзінің қарашығындай сақтап, мақтан тұтып, рухани азығы, ел байлығын құрайтын дүние ретінде бағаласа дейміз.
«Алматыкітап баспасы» жазушының еңбегін 70 жылдық мерейтойына арнап, аздаған толықтырулар енгізіп, қайта басып отыр.