Қазақстан Республикасы Парламенті Сенатының депутаттары «Алматыкітап баспасы» ұжымымен кездесті.

Ағымдағы жылдың 08 шілдесі сенат депутаттары: Нұртөре Байтілесұлы Жүсіп және Динар Жүсіпәліқызы Нөкетаева еліміздегі ең ірі - Алматыкітап баспасына іссапармен келді.  Кездесу барысында, білім мен оқулықтарға қатысты бірталай өзекті мәселелер талқыланды.  Мемлекеттік тілде жарық көретін кітаптардың, оқу-әдістемелік материалдар мен оқулықтардың сапасы қандай, оны жетілдірудің жолы қайсы деген тақырыпта ой өрбітті. Сенат депутаттарына, Алматыкітап баспасының президенті Гаухар Айтжанқызы Саймасаева отандық «TopIQ» тұңғыш білім беру платформасының түсін түстеп, тиімділігін талдап, таныстырып өтті.  Халық қалаулылары әрбір электрондық оқулық – оқу бағдарламасы мен пәннің мазмұнына сәйкес құрастырылып, түрлі интербелсенді тапсырмалар, аудио-бейне материалдар, анимациялар, шағын мультфильм, ертегілермен толықтырылған біртұтас мультимедиялық өнім екендігіне көз жеткізді. Осы орайда, білім беру саласындағы жаңа платформаны одан әрі жетілдіруге, қолдану аясын кеңейтуге қатысты түйген тұжырымдарымен де бөлісті. Кездесу соңында, баспаның тәжірибелі мамандарымен жеке танысып, олардың ой-пікірлеріне құлақ түрді.  Мәселен, орыс тілінің редакторы Ольга Сергеевна Держинская депутаттардың сауалына, «Алты атадан бері Қазақстанда, осы Алматы қаласында тұрып жатырмын. Осыдан кейін бұл менің Отаным емес деп қалай айтуға болады?. Мен елімді сүйемін. Сондықтан да қазіргідей аумалы-төкпелі кезеңде жұртымның амандығы мен ел іргесінің бүтіндігі - менің жалғыз ғана тілегім! Сұрағым жоқ!» деп, жауап берді. Елдің тілеуін тілеген жанның жүрекжарды лебізіне Нұртөре Байтілесұлы, А.С. Пушкиннің «Позвольте, жители страны!» өлеңіне өзі шығарған қазақша нұсқасымен жауап берді. Баспамызда жиырма жылдан астам уақыт еңбек атқарған, зейнет жасындағы қазақ редакциясының бас редакторы Лесгүл Сәрейқызы болса,  «Осы жасқа келсем де, балаларға бір кітап, бір оқулық болса да дұрыс жетсін деп жұмыс жасап жатырмын. Әйтпесе, үйде отыратындай-ақ жағдайым бар. Сонымен қатар, аударма жайы алаңдатады. Орыс тілінен көптеген дүниелер дұрыс емес, тікелей аударылған. Қазақ тілінің өз ержесі мен заңдылығы бар. Неге соны ұстанбайды?! Соған көңіл бөлсеңіздер» деген тілек-назын жеткізді.  

Ел үмітін артқан саяси тұлғалар баспа үйіне келе тұрып,  кітаптарды көрмей кетуді жат санап, жас болса да баспаның бас дизайнерлері отыратын бөлмеге қарай беттеді.  Ол жерде жақын арада жарыққа шығатын ұлт ұстазы - Ыбырайға арналған «Даланың таза бұлағы» атты жаңа туындының мұқабасы мен мазмұнын талдады. Бағасын берді. Жас суретші мамандармен сурет рәсімін жасады. Содан соң баспаның ең сирек және үздік кітаптар сериясы жинақталған кітапханасына кірді. «Кітапқұмарлардың  жұмағы» десе жаңылмас осынау жерде, ұлтты ұлықтатар «Шаңырақ» сынды шыны биік кітапты парақтады. Ертегілер мен шетел балалар әдебиетінің ең үздік аудармаларын ақтарды. Елімізде осындай сырты мен іші, мазмұны мен мәні келіскен кітаптардың жарық көріп жатқандығына расымен риза болды. Елімізді рухани қазынаға байытудан қажымаған, Алматыдағы «Алматыкітап баспасы» ұжымына алғыстарын айтып, жылдан жылға жасап, көркейе берулерін тіледі.

Смотреть все новости