- Официальный сайт издательства "Алматыкітап баспасы"
Өзімнің есебімде,
Мен биыл дәл қырықтың бесеуінде.
Ұйықтап кетсем болғаны төсегімде,- деп өлең жазып, дәл қырықтың бесеуінде қайтқан, ақиық ақын Мұқағалиді танымайтын, алтын сөзді өлеңін жаттамаған жан жоқ шығар.
Мұқағали Мақатаевтың туғанына биыл 90 жыл.
Мақатаев Мұқағали Сүлейменұлы (1931 жылы дүниеге келіп, 1976 жылы дүниеден өткен. Шын аты Мұхаммедқали) – қазақтың лирик ақыны, мұзбалақ ақын, өз заманында лайық бағасын ала алмаса да өзінен кейінгілер үшін мәртебесі биік ақиық ақын.
Өр Алтайдың баурайында өскен, өр тұлғалы ақынның бейнесі халық жадында.
Бір өлеңі бір елдің мұрасындай болған Мұқағали ақынның:
Тәкаппар таулар жатқан жан-жағында,
Барып қайт салқын самал малды ауылға.
Бір жер бар «Қарасаз» деп аталатын,
Көресің жолың түсіп барғаныңда.
Көресің көк орманын, жылғаларын,
Мөп-мөлдір қайнап шыққан тұнбаларын.
Жылғаның жағасында бұзылған үй,
Сен соған ей, жолаушым бір қарағын, – деп басталатын осы бір өлеңі біреулер үшін туған жерін сағынған ақынның жай ғана жүрек тебіренісі болар, бірақ, сол Ескі Қарасазды көзімен көріп, сонда тірлік кешкен әрбір адам үшін бұл өлеңнің мағынасы өте терең әрі ыстық.
Мұқағали ақынның балалық, жастық шағы, яғни, өмірінің үштен екі бөлігі осы Ескі Қарасаз ауылында өткен.
Осы түртіп қалсаң, тауымен тасы да өлең оқитын айрықша атмосфералы мекенде Мұқағали Мақатаевтың 90 жылдық мерейтойы атап өтілді.
Мерейтойдың алғашқы күнінде қонақтар ақынның туып өскен ауылындағы әдеби мемориалды музейімен танысты.
«Алаш жырының ақиығы» атты ғылыми – тәжірибелік конференцияның қонағы болды. Ертесі Райымбек батыр ауданының орталығына орнатылған Мұқағали Мақатаевтың ескерткішінің ашылуы болды.
Аталмыш шараға Алматыкітап баспасының қызметкерлері де қатысып, ақын өскен ауылдың ауасымен тыныстап, табиғатына тамсанып, киелі мекенді шарлап қайтты.